Kan khua ah chuan Sikulpui a kal/lut turin interview leh test tihvel a awm velo, Ban Lu chungah kan han phar kual a, Beng leh lam khawihpha kha chu kan tling a ni mai, ava lunglen thlak em. Keipawn kalo ban phave ta ngei a, sikulpui kal turin ka inbuatsaih ve ta. Kan retheih em avangin sikul uniform pawh a thar ka nei zo velo, kan thenawm te nau hak hlui chu ka chantawk a ni. Mahse chumi ka nei ringawt pawh chu ka thinlung hi alawm veng veng mai a ni. Chuan le sikal kal tan ni alo thleng ta, sikulpui ka kalve tawh dawn avang a ka hlim zia kha engtin emaw sawifiah theih se ka va ti em…heti hian han tehkhin dawn teh ang. Naute hnute chak a tap tuar tuar in a Nu hnu a han hne chiah thinlung lawm dan tur hi han suangtuah ula, chu ai pawh chuan a nasa ngei ang. Ka lawm ka hlim ka phur hliah hliah hi a ni ringawt mai.

Le, ka kal dawn ta tak tak e, zing chaw eikham ah ka insilfai a, uniform chu ka han inbel ta…ka phur lutuk chu ka helhhawlh niber hian ka hria. Ka Pa in min thuisak Ipte chhung ah chuan ziakloh puan ka Nu in khawlla var a a chilhkhawm chu akin, ka pencil chu ka tihbo hlauin ka Pa chuan ka Ipte ah chuan hruiin min thlun sak a, chhungte hruai ka ngailo ka kalve ta rawih mai a ni.

Chuan le zing dar kua a ri ta, Jeep wheeldrim sikul dar atana hman chu chawkidar chuan a han khawng ri ta mang mang maile. Zauthauna leh phurna inpawlh tamtak kar ah chuan sikul kal duhlo, an chhungten an nawrluih vanga tap hawm hawm hote nen chuan sikul tualah chuan kan tlan khawm ta raih raih maile. Zirtirtute chuan min han intlar tir ta a ni. A hautak ngawt angle zirtirtute tan khan. Chuan final interview a thleng ta, amal te te in min han ko a, Ban leh lamin Beng kan khawih phak leh phak loh min han endik ta a, a ban pha ho zawng chu kan room turah chuan min luh tir ta a ni.

Room a te si, kan tam bawk si ava hahthlak em. Thutna pawh kan inchan talo. keichu thutna pawh changloin, sikul bangrel ah chuan kil khatah ka thuve ta ran maile. Mahse ka lungawi em em tho. Zirtirtu in hming a han lam a, a awm apiang “awm tichunga Ban phar zel tur a ni”. Kan zirtirtu nu chuan ka hming a han lam ve ta chiah a, thutna tur pawh ka neivelo tih arawn hmu ta a, mahse tih theih a nei chuanglo.

Hming lam pah chuan a khat tawkin “bengchheng suh ti pah in Dawhkan chu a Tiang ken chuan a han vaw ri thuai thuai a”. A then thutna inchuhin anlo in vel tap bawk, Zirtirtu hna ropui zia tun hnu hian min hriatchuah lehzual tir a ni. Zaidam leh dawhtheihna ngah ava ngai dawn tak em. Hming a han lam zawh chuan sikul tan ni a ni bawk a, kan bang hma ang” a han ti a, chu veleh a chhuah pawh nghak hmanlo chuan “YES….” tipahin kan tlan chhuak nghal ta nawk nawk mai a ni. Hnung lam atangin zirtirtu chuan “in nek suh u” a rawn ti lawm lawm pawh ngaihsak lemlo chuan ka sikul ni hmasa ber chu ka thlah liam ta a.

Chhunzawm zel kan tum dawn nia.

Vawiin ni alo thlen hian ka lung aleng ru riau mai a, a chhan tak erawh chu sawithiam pawh a har khawp mai. Kan naupan lai chuan Good Friday hi kan hmang urhsuh thei em em mai a, thingtlang a piang kan ni bawk a, thingtlang nun bawk hian a nih hi ka lung minlen tu zawk tak chu. Kan hna ten a zir loh em vang nge ni a ka inthlahdah tak em em nachhan hi ni ang aw ka ti thin? Kohhran hi ka bel tam  talo hle mai a, mahse Kohhran ka belh tam takloh atang hian ka khawhar ru riau tlat thung si a ni. A hma in ka inhmang em em tihna erawh a ni chuanglo. Mahse tun hnu nen a tehkhin chuan danglam tak ka ni.

A thupui atang hian Pathian thu tamtak ka ziak dawn in ti mai thei, mahse chutiang lam em em pawh ni chuanglo, ka rilru a a awmve dan rawn ziah ka tum zawk a ni. Keimah ah pawh hian chiang takin ka in hria a, Pathian ngaihsaklo leh mahni duh dan dan a han nun ve bawk bawk chang ka neih te hian, nuam ti a hun hman chu sawiloh, inthiamlohna hlir leh inchhirna hian ka khat nghal zung zung thin hian amah hlat ka ngamlohzia ati chiang bawk in ka hria. Thuziak thiam takte han ni ila chuan sermon ropui tak te pawh a chhuak mahna, thiam tawk tawk in ziak zel phawt mai teh ang.

Amah rinngam hi ringtu tha tak tan pawh hian thil har a ni tih chu kan hre theuh awm e. harsatna kan tawh changte hian amah chu kan beisei thin nameuh mai, mahse amah ringngam tak tak hi chu engzat tak awm ang i maw? Kei ngei pawh hian ka rinngamloh chang hi ava tam em. Mahse rinngam Pathian a ni si a. Sual rawngbawl a amah ngaihsaklo tute tan pawh hian ava tha em. Ka nunah sual in hna a han thawk ta tak tak mai chu, rinawm tur hian huaisenna reng ka nei tawhlo niber hian ka hria. Pawisak ka neilo tan dawn tak tak emaw ka ti hman hial a ni. Rinawm tur hian HUAISEN hi ava lo ngai tak em.

Sual rawngbawla tal tamtak, mi bawraw leh huaisar tak tak te leh huaisen em em tura kan ngaih te pawh hi an dawihzep vanga sual rawngbawl ta tam tak an nih ngei ka ring hial a ni. Rinawm tura huaisen hi ava lo pawimawh tak em. Ringnang tura huaisen a pawimawh hle a ni. Kan LAL ISUA chu kan sual te min tlanna turin a thi a (chuvangin Good Friday pawh kan lo hmang ta a nih hi), chu chu aring apiangte tan chhandamna a ni. Kan tan a nun a hlan a, kan chhandamna chu amah ah ani tih pawh ringngam tur hian kan huaisen a pawimawh hle bawk a ni. Ringngam turin huaisenna i nei em han in zawt teh le. Ka rawn sawi tum tak pawh hei hi a ni.

“Kan tan a thi a, chu chu ringngam turin huaisenna i nei em le.?”

!4^th February vang a thil thleng zawng zawng hi ava tam em…mi tamtak chuan an nunna hial an chan phah a, hmangaihna lem leh in bumna vangin. Mi tamtak chuan tullo ah sum harsa taka an thawhchhuah kha an khawh ral mai mai bawk a. Mipa ten an bialnu te tan inhualna hmangaihna tak tak ni silo neih tumin an hman hlel a, hmeichhia te pawh bang chuanglo. Chuan hmeichhia ten hun rei tak an thianghlimna an lo vawn tawh chu hmangaihna lem leh he Ni nidang nena danglamna awmlo vang hian an lo hloh nual bawk a. Mi tamtak te chu an thinlung kehchhia vangin an mahni nunna hial an la a. Buaina tamtak an in siam belh a ni. Heng zawng zawng hi he Ni nidang nen a in ang reng vang mai hian a ni. Ngaihtuahna han hmang zau deuh ila chuan harsatna kan tawh tamtak hi kan pumpelh ngei ang.

Kan hmangaih tak tak te chungah kan hmangaihna kan lantir tur a ni lawmni iti a ni mai thei, aw ni e, matheilovin kan lantir tur ani alawm, mahse nikhat atan chuah nilo, kumkhua atan a ni zawk dawn lo em ni? Hemi Ni chuah hian kan lantir a nih chuan hmangaihna tak tak nilo, hmangaihna suak a ni zawk tihna a ni. Hmangaih tak tak te chungah chuan nitin hi Vanlentine’s Day a ni vek dawn lawm ni? He Ni nidang nen a danglamna awm chuanglo vang a ilo buai ve vak a, tulloah I in tih buai vak kha awmzia ava awmlo tak em. I hmangaih nen a in in hmangaihna lantir nan khan ni special bik enge a ngaih chuan na?

• MIPA TAN AW

I bialnu/nupui I hmangaih em em kha hemi Ni ah hian thildang special em em tihsak lo mah la I hmangaih takzet a ni tih a hriat kha atan chuan thilpek ropui leh hlu ber ani asin. Sum leh pai harsa taka I thawhchhuah kha tulloah I khawhral mai mai nachhan tur a awmlo. Chutiang bawkin I hmangaih em em lak atang pawh khan thildang special em em I phut kher a ngailo, a hmangaih che ani tih I hriat kha a hlu in a ropui tawk em em a ni lawm ni. A lak atang enge I phut le? Sum leh pai thilpek ropui tak tak em ni? Nge hmangaihna aiin chung chu ilo beisei zawk? A hmangaihna kha ani lawmni I duh ber zawk chu? Chuvangin inti lungngai duhsuh hemi Ni vang hian.

• HMEICHHIA VE THUNG AW

I bialpa/pasal lak atang thil enge emaw special lutuk I dawnglo ani mai thei, mahse kha kha engatinge I lak serious vak na chhan tur awm le? A lak atang khan enge I duh a enge I beisei, nangmah kha in hrilh nawn fo rawh. A hmangaihna thlazar hnuai a thlamuang taka awm tluka hlu kha itan thildang enge awm chuang le? Nikhat atan a asum leh pai thilpek tha tak tak pe thur thur thei che nge itan hlu a, hmangaihna diktak nen a hmangaih tu che ni ang? Chuvangin nang hmeichhia nangpawh thil ho mai mai vangin inti lungngai in inti buai duhsuh. I hmangaih pawh khan maw thilpek special tak aichuan I hmangaihna diktak aia hlu kha a duh chuanglo tih I hre reng dawn nia. Nangmah hmangaihtu diktak chuan nupui atan aneih hma che chuan tihchhiat che hi a phal ngai dawnlo tih kha hre reng ang che aw. Chuvangin nangpawh atan chuah invawng thianghlimin rinawm tlat ang che.

Valentine’s Day kan hmandan leh kan rilru a a awmdan hi a pawimawh khawp mai. Thlamuang taka kan in hmangaih ani tih kan in hriattir tawn hi a pawimawh ber chu a ni. Sum leh pai tamtak seng kherlo hian hmangaihna leh in duhsakna hi a in hlan theih ani tih hi I hre theuh ang u. Valentine’s Day hlim taka hmang theuh turin duhsakna ka hlan a che u.

Kha tlereuh dawr ah khan hrelawk ni ila kan intawng awm silo a. February 12 a ni tiraw, Valentine’s Day a kan inpek ve ve tur kan endun tihkha hrelawk awm tak ang maw.? I entur ka ban khalh che khan ka phuzawk nge i phu zawk zawk le? Thilmak deuh chu a thleng a nih kha. Mahse mak ka tih em em chu maw, rei deuh kha dawr ah khan kan awm chung a kan inbe miahlo kha a ni. Nge pek tur ka nei tho tiin kan ngaih a tha ve em em zawk le. I kal hma a kal hmasak ka tumlo tih kha chu i hre kher awm silo a. A chhan chu ita tur a ni tih hremiahlo khan i awm laia lei kha ka’n zak tlat pek a nih chu mawle, ka palo thei ngei mai.

Chuan i kal hnu khan min ngaihtuah ve a ngemle? Keichuan tunge a bialpa ni ang aw? A bialpa chu ka va han thik tak ti rilru chungin ka ngaihtuah zui vawng vawng che tih pawh i hre silo. Message ka thawn che khan nangmah ka thawn che tih pawh ka hrelo a, i hrelo bawk, mahse mak chu kan ti dun lutuk tih chu ka hria. Kan duhzawng SMS a kan inzawh lai khan kan awmna lo sawi ila chuan hetiang em em a na hi ka tuarlo tur. Inchhir in a sawt silo.

Chuan titawi deuh mai ang, inhmu tura kan intiamna hmunah khan maw ka thleng hma a nia aw, darkar 4 zet nghak chung che khan ka ning miahlo asin. Mahse kan sawilawk angin darkar 4 a ralchuan kallo turah kan in ngai a nih kha. Tinge darkar 4 kher kher kan tih le? Darkar 3 tal nise kan inhmu hman mai thei asin. Enge a chhan? Enge a awmzia ni kher kher le ka hrelo. Amak a na a ni.

Kan hun tiam aliam kha ka phal mawlhlo asin, ka phallo, mahse chelhdin zawh rualloh ani si. Chuan ka rawn call che, vawi 4 bawk a ring zo a ni kha. A vawi 5 na kha maw khatiang thu hretur ka ni tih inhria ila ka rawn call nawn ngailo tur a nia. Mahse enge ka thu hriat hi nita? Nungchungin ka thi niber in ka inhria.

Engatinge ilo mut hmasak kher kher le? Chhun ah i mu ngailo a nilawm ni? Engatinge kan hun tiam kha sawn hma i rawn rawt mailoh? Kaihthawh rualloh khan ilo muhil nghet tawh si. Ka awih theilo, ka ring theilo, ka phal mawlhlo asin, heti mai a i kal hi. Kha dawr a kan intawng kha e, ka tah titam tu ani a sin. Lo hmu hmanlo law law che ila tha zawk tur. Mahse, awmzia a awm tawh silo.

Hmanah kha chuan ZAWLAIDI kha chuan hlimna a thlen a, tunah chuan kaihthawh rualloh a mutui in a siam si che maw.! AW ZAWLAIDI engatinge ka D duhlai chu mual iliam tir tak mai le? Ka D duhlai aichuan nang hian mual chu min liamsan zawk mai rawh. ZAWLAIDI nunrawng tak zawng ilo nih hi.

 Kum dangte ka han ngaihtuah a, Christmas hmang tur a ka inbuatsiah dan te leh ka rilru put dan te ka ngaihtuah let hian, ka thinlungah inthlahrunna nasa tak a rawn lut tlat mai a nih chu. Zep nakah kan la thalai ve deuh bawk  nen kum dangah chuan khawvel  hlimhlawp leh mahni duhzawng te ngaihtuahin ka talbuai ve em em thin a, mahse a hun alo thlen meuh chuan ka zawn hlimna chu ka hmu chuang reng reng lo. Hlimna hmuh chu sawiloh kawng tamtak ah inchhirna ka neih chang atam mai. Sum leh pai tamtak sengin hlimna ka zawng a, nulat tlangvalna nen Christmas chu hlim taka hman ka lo tum thin. Hetiang hian nangni ho paw’n rilru inlo seng nasa ve thin ang tih pawh ka ring a ni. Enge intawn a enge inchungah lo thleng erawh ka hre lo. Hlimna in hmu tak tak nge? Inzawn hlimna chu in hmu biklo zawk erawh ka hrelo, keichuan ka lo zawn thin hlimna chu ka la hmu ngai reng reng lo a ni.

Han sawi tawp tawp mai ila, khang khawvel taka hun ka lo hman tawh thin avang khan hlawkna leh hlimna han sawitur em em ka neih pawh ka hrelo. Ka inchhirna hi a tam zawk mah thin in ka hria. Mahni phak tawk tawk ah khawvel taka hun ka lo hman ve thin khan kawng tamtak ah hlawkna min pe han ti ila, hlawkna han tih ah inchhirna thinlung avang a hlawkna lam a ni zawk mah. Khawvel taka hun ka lo hman avang khan insiamthat duhna ka lo neih ve thin kha ka hlawkna hmuh chu a ni mai in ka hria, a bak hlawkna ka neih reng reng ka hrelo.

Awle, ka hun hman tawh dan ka han sawi teh duah a, tunah chuan ka sawi tumtak ah han lut tawh teh ang. Khatiang hun ka lo hman  tawh avang khan ka thinlungah hian inthlahrunna nasa tak a lo thleng a, thinlung bawlhhlawh leh khawvel tak a hun ka lo hmang thin chung pawh a, malsawmna hlir a min umzui avang hian ka inthlahrung lehzual bawk a ni. He ka thinlung bawlhhlawh tak hi LAL kan tana lopiang chibai buk tlak pawh a nilo, chibai buk pawh ka inthlahrung em em zawk a ni. Mahse ani chuan khang ka hun lo hman tawh zawng zawng te kha a hrereng tawh ngai silo, theihnghilhin a hmangaihna leh khawngaihna nasa tak chuan min la pawmin, malsawmna in min la vur zel zawk si. Amah khawvel taka chibai ka lo buk tawhna te chu theihngilhin thinlung thar nen minlo kunagkuah leh mai thin si a. Chawimawi tlak leh chibai ropui tak buk tlak LAL NGILNEI tak ava ni tehlul em. Amah hawisan ngam tur pawh hi ka nilo. Kan LAL ISUA chauh hi faka, chawimawi a, a rawng chauh bawl tur kan nihzia hi kan thinlungah hian lo thar leh mawlh tehse.

In thlahrunglo tak leh khawvel  taka  Christmas ka lo hman tawhna khan ka nun ah hian thil ropui tak thlen tir mawlh tehse tih hi tun kum ka CHRISTMAS thupui chu a ni e.

CHRISTMAS CHIBAI VEK ULE.

Thuziah tur hi buai tak tak phei chuan alo baihvaih theih hle mai a, ngaihtuahna hman hman mangloh emaw, ngaihtuah loh lutuk vang pawh a nia nge, post update hi taimak alo har hle mai. Rilru ah ziahtur engemaw neuh neuh han neive thin mah ila, han tih tak tak loh hi chuan puitlin alo har khawp mai. Thiante ho lah hi in hman lutuk nge ziahtur leh rilru a awm hi in ngah ve hrim hrim zawk pawh ka hrelo, in va fakawm tak em..

Tun tumah pawh thil tam teh duah ziaklo in ka blog theme ka siamthar e ka tia, chumi rual chuan kan tive leh nawk nawk a nih hi. Tlem a mit tikhamlo leh hmuh nuan deuh tur ngaihtuah chungin kan tive ta rawih a ni e.

•  Thildang daih han sawi leh lawk teh ang, Mizo te zingah hian Blog/Website siam kan intih hmuh ta hle mai a, tam pawh atam chak khawp mai. Chuvang chuan mitam takin mahni pual a blog emaw site neihve duh kan awm chuan biak theih reng ka ni e. Nangmahni duh angin, eng platform pawh design hrang hrang in ka siam thei e.
• WordPress, Blogger, Joomla leh a dang dang pawh template ka siam thei  reng bawk a nia.

A tir in Pathian in Lei leh Van a siam a, chutiangin Chhun leh Zan, Mipa leh Hmeichhia, a inkawp vek zel nia mawle. Han ngaihtuah neuh neuh chuan, thil mahni a awm alo awm reng reng lo. He khawvel a thil awm te hi a mah mai chuan alo kim thei meuh lova, a tu a te pawh, thilnunglo thleng hian kawppui anlo nei theuh mai a ni. Entir nan Dawhkan pawh in a kawppui a tan Thutthleng a nei a, thildang pawh han chhut neuh neuh chuan akar ah LEH alo awm zel mai kan Pathian meuh poh Hmangaihna Pathian a nih ruainl a lehlamah hrem theitu Pathian a lo ni leh zel a. A pakhat chauh hriat chuan nun hi a hrilthui lo teh a sin aw. Hringnun kawng chhukchho tak kan zawh mek lai pawh hian thil chi hnih in min lo hmuak reng a, Hlimna leh Lungngaihna te, Tah leh Nuihna te, Retheih leh Hausakna te pawh, Vanduai leh Vanneihna te, Chhia leh Tha te thleng pawh in, a pahnih a kan hriat loh chuan a buaithlak teh ang chu. Thatna hi hmuve ngai lovin a chhia chauh hmuthei ila kan damchhung chu “Duhloh Rai” ang mai in kan hmangliam ngei ang le. Vanduaina leh Harsatna te kan chung a alo thlen chang hian, kan hmalam hun ah vanneihna kan la tawng ve mahna tiin mitin hi kan la nung ve hram hram zawng a nih hi.

Nula leh Tlangval kar ah pawh hmel induhna te lo piang in, inthen thei tawh lo hial awm a mawi in kan in thlahlel in kan in ngai em em thin a ni. Mahse chu inzawmna phen ah chuan thenna biahthu pawh alo inrawlh ru ve reng thin mai, kan tuarthiam lova midang tawng thei tawhlo tur ah te in ngai in, lungngai tak in a tam zawk chu kan in dawmkun thin a ni. Ni e, alehpek ah enge lo thleng tur beiseina chu kan hmu thei tlat lo thin a tin ni.

He khawvel thenna ram ngei ah pawh hian kan damlai la la emaw ten kan hmangaih ber ten emaw min han kalsan a, kan hmuhphak reng ah hlim tak a an chetla han hmuh hi chu rilru chhungril tak a pawmpui mai chu thil har tak a ni.

Mahse hun leh ni te lo liam ve zelin duhtak te chu kan tawng ve leh mai bawk a, kan ngainat em em kan hmangaih te ngei ngei thihna kut vawt in lo man ve in he khawvel ah vawi khat mah tawng leh ngai tawh lo tur in thlanthim tak ah an han zalh a, a tuar tu tan chuan a NA a ni. Kan duh reng vang ni lovin ngai leh ui tak chung zel a kan then a tul si thin, thenna ram a ni miau a tin ni. Mahse chumi piah a tawn leh na ram thlir thiam a hmuthiam chauh te chuan he lei hringnun hi lungawi tak in an hmangzel bik dawn chu a nih hi. Mahse heihi chu hria ila hlim takin kan la intawk leh a ngem…..tih hi? Hetah tak hian intawn LEHna lai tak hi a pawimawh ta a ni. Kan hmangaih, kan U leh naute tawng LEH tur hian kan nun kan  uluk ava pawimawh tak em.

OPA

MFA chungah hian lawmthu sawi mawlh mawlh tur kan niin ka hria infiammite leh a ngaina tute chuan. An ni tello hi chuan kan ram Mizoram ah football hian hma a sawm tak tak theilo a ni. Chutih rualin kan theih ang ang a kan backup pawh a pawimawh hle a ni. Hetiang league hautak tak mai min han buatsiah thei tur hi an fakawm thlawt a ni. Tlinlohna leh thiam tawklohna tamtak chu an nei ngei ang, mahse hengah te hian mawhchhiat mai loin kan finchhuah zawk hi a pawimawh tak meuh a ni.

Play Off chu khelh zawh a ni ta a, Mizoram Premier League 2012-2013 kheltur pawh kan hrechiang ta. Hengte hian MPL 2012-13 chu an khel dawn ta a ni:-

1. Mizoram Police FC

2. Dinthar FC

3. FC Kulikawn

4. Luangmual FC

te leh Play off atanga point hmusang pali (4) ten an khel dawn a ni. Play Off table chu hetiang hi a ni e.

 MIZORAM PREMEIR LEAGUE PLAY OFF TABLE FINAL

1. Gas harsatna chungchang : 

Pic Source : Chanmarians

Tunlai chu kan hretheuh awm e, kan Zoramah hian eirawngbawlna atana kan hman tam ber LPG (Liquefied petroleum gas) ah harsatna kan tawk nasa hle mai. Kan la hre theuh awm e, hmanni lawk (ti mai teh ang) kha chuan kan kawtkaiah Cooker chhia leh thirchhe zawng tluk zet a tamin an rawn zuar thin a nih kha “Gas duh em tiin“. Kha tawngkam leh auhla kha ava ngaihawm tak em. Tunah chuan mumangah pawh kan hrepha tawh bawk silo.

Engvanga heti em em a harsa ta nge kan nih erawh hi chu hriatthiam a har a ni. Kan thunei tute lam inthlahdah vang nge hma an lak loh vang ni ang aw…? Kan thenawm lawk Shillong angah te chuan hetiang em em a harsatna an tawh awm pawh hriat a ni bawk silo. Helam changtu department lam tan chuan zah ngawih ngawihna tham lian tak niin ka hria. Kan aiawha kan thlantlin kan hotute hian anrawngbawlsak mipuite hi han ngaihtuah ve deuh sela chuan ava lawmawm dawn tak em. VIP lamah hian Gas harsatna hi an hreve tho a mahse an tawk velo zawk ni angle..? Mipuite hi an VIP te kan nilo em ni..? Engtia hmalak tur nge  ni a, khawilamah nge nawrtur tih hria leh thei tan chuan awm mai mai a hunlo ngawt mai.

2. Power Electricity Supply chungchang:

Gas lam harsatna kan sawi zo tawh a, tunah chuan Electricity supply chungchang han khel leh dawn teh ang. Gas harsatna kan tawk nasa em em a, chumi phuhru tur chuan zep nakah mitamtakin Electric Heater pawh kan hmang sup sup ta mai. Mahse Power supply lamah namenloin kan buai lehnghal ringawt chu a ni si a. Veng thenkhat ah phei chuan power supply an nei thalo em em a, mahse thenkhat ho chuan an nei tha tho bawk si. Tun kan sawrkar kallai ah hian heti em em hian engetinge mipuiute hian harsatna kan tawh tak mai le? Mipui rawngbawl lo hian an mahni chuah hi an in ngaihtuah ta em ni.? Mipui mangang authawm hian an bengah awmzia a neilo zawk em ni? Hetiang em em a harsatna kan han tawk ta thut mai hi a mak a, hriatthiam a hat tak meuh a ni. Electric Power Supply tal hi han hnianghnar ve deuh ila tha tur a nia. Engtikah tak duhkhawp hi nei ang i maw..?

3. Petrol/Diesel harsatna ve thung:

Kan hretheuh awm e, petrol leh diesel tello a kan awm theih tawhlohzia chu. A man lah chu a sang tulh tulh mai bawk si, mirethei te te tan chuan khawsak hi a harsa em em a ni. Khawsak loh aiah kan khawsa ve tawk tawk a niber mai a nih hi. A man sang pawh tih tawh nak alaia alo awmlo ve chhen mai bawk nen thin a rim duh khawp mai. Thin tirim zual em em tu chu petrol/diesel a awmlo coupon a ngai an han tih phei hi chuan, keini ang sawrkar zem zen velo tan leh zen pha velo tan chuan thin hi a rim ve em em ringawt mai a, tihngaihna tak erawh kan hre chuang silo. Kan hmalam hun hi avathim tak em ti a han indawmkun ngawtlah ni thei heklo le, theih ang ang a kan hnathawhna ah kan beih ve tang tang mai loh chu engmah hmasawnna tak tak han beisei ngam pawh hi a ni meuhlo a ni e. Petrol/Diesel a man a sang tual tual, avang tual tual, a chhe tual tual hi a niringawt hian a hriat a ni. Hemi kawnga mawhphurtu kan department hotute hian an theih tawp han chhuah sela, hmakhaw engtak chu hmu mai thei kan ni hian ka hria a, mahse chutiang hmalakna erawh chu a awm meuhlo ni ngei tur a ni. Engtintak awm zel ang imaw..!!!

4. Kan inkalpawhna Kawngpui chungchang: 

Tuihawkin luanna tur avai

Helam thu hi a tawp kharnan i han sawi leh lawk teh ang. Kan khawpui chhung hi han thlurbing deuh bik ila. Kan khawlai kawng han chhiatzia chu kan hre tlang anga, a ngaihna a awmlo niber mai. An han repair ve tak na a, fur khat pawh daih heklo. Engtinnge hetiang em em a tlolo hian an siam thiam zawkle tih mai tur a ni. Kan tuihawk te lah hian luan ngaihna hreheklo, a luang vel mai mai niber mai. Kan kawngpui hi chu vawikhat tha tawk hian han siam sela a daihrei thei angber turin, chuan a enkawl chhunzawm pawh a nuam deuh tur hi a nia. Hnathawktute hian an thawh thatloh chuan sum petu lam pawh hian hrensak ngam mai thin sela chuan hma kan sawn ngei pawh ka ring a ni.

Awle, i duhtawk mai teh ang, tun dinhmunah chuan khua hi avarlo teh e, engtikah tak Zoramthar hi piang angmaw.? Kan Kristianna pawh hian min phuar zo tawhlo niber hian ka hria. Heng kan harsatna points 4 (li) lek kan sawite hi han sutkian chu nimai se chuan ava nuam dawn em, hengte hi a lian zualte an ni a, hengte hi awmlo se chuan Zoram nuam tak pawh a awm ngei ka beisei a ni.

Hengte sukiang tur hian keini thalaite hian enge kan tihtheih tih ngaihtuah a, kan theihna kawng kawng a hma kan laka, kan beih hi a pawimawh takzet a ni.

Image: FreeDigitalPhotos.net 

Thalaite tan leh SMS hmang tam te tan chuan thu lawmawm tak a ni ngei ang. Delhi High Court chuan TRAI in regulation alo siam tawh nikhatah SMS 200 chuah thawn theihna chu tun Friday kal ta khan a hnawl a ni. Hei hi a chhan chu “kan ram danpui pakhat Freedom of Speech chu a palzam a, a bawhchhiat bakah Freedom of Speech enjoy tute a tuartir a ni” tiin thuchhuah a siam a ni.

Post hmasa (HETAH) lamah pawh kan sawi tawh kha, TRAI chuan nikhat ah SMS 100 chauh thawnchhuah theihna dan a siam a, sawiselna tamtak avangin 200 a ti leh a, mahse heipawh hi mi tamtak tan chuan ala tawklo hle a ni. Hei vang hian sawiselna pawh atam hle a ni. Ni e, TRAI in he dan a siam tirh khan ka ngaihtuah mai mai a, hetianga inkhuahkhirh ringawtna dan hi kan ram ah chuan awm theiin ka hrelo deuh reng a ni. Kan ram India ram hian mipuite zalenna hi a ngaipawimawh hle a, mipuite hi min zah hle a ni. Hei vang hian Delhi High Court chuan TRAI in regulation alo siam tawh chu a hnawl ta a ni.

Han sawibelh mai mai ila, SMS hi atangkai em em a, thalai tan phei chuan thaikawi biahthu (nge hmeh neuh neuh biahthu) inhlanna ber a nita a nih hi. Phone call hman a rem lohna ah pawh SMS hmang chuan chanchin kan inhrilh zung zung thei a ni. Chumai bakah information han inpekna atan pawh atangkai tak hle a ni. A tangkaina chu a hmang tam apiang hian an hre mai awm e.

• TRAI regulation siam chungchang han sawi zau lawk ila.

TRAI-in khatia regulation a han siam takah khan service provider te chuan an zawm lo thei silo a, mi tamtak chuan service provider te kan dem em em a nih kha. Mahse service provider te chuan an chunga roreltute thu an zawm mai a ni. Kanlo demve ngawt kha kan hriatloh vang zawk a ni.

• Engvanga TRAI-in regulation siam nge a nih?

TRAI-in regulation an siam chhan tak chu service provider ten an customer te hnenah SMS chi hrang hrang an thawn nasat em vang a ni.

• Service provider te thiamloh em ni?

Hetiang SMS an thawn tamtak erawh hi chu an customer te hnenah information an pekna te pawh a ni. Advertisement tamtak chu awm bawk mahse, heng SMS te hi kan hriatloh vanga keimahniin kan lo subscribe vangte pawh a ni bawk a ni.

• Engtinnge kan tih tak ang?

Hetiang SMS alert zawng zawng hi a tihtawp vek theih a ni. Kan service provider theuhte customer care atangin emaw DND service hmangin kan titawp vek theih a ni. Kan zalenna theuh hi hmanthiam a pawimawh a ni.

Chuan tunah chuan SMS duh zat zat kan thawn thei ta, enjoy ila, hmang tangkai ila, mahse midang tan hnawksaklo hram turin mahnin theuh I in adjust ang u.

]]> http://www.marvinic.com/2012/07/17/trai-regulation-siam-chu-delhi-high-court-in-a-hnawl/feed/